കാത്തിരുന്ന ആ വാർത്ത എത്തി, ‘കുഞ്ഞു ജനിച്ചു അച്ഛനും കുഞ്ഞും സുഖമായിരിക്കുന്നു’, സിയയ്ക്കും സഹദിനും കുഞ്ഞ് പിറന്നു
കേരളം കാത്തിരുന്ന ആ സന്തോഷ വാര്‍ത്ത മണിക്കൂറുകള്‍ക്ക് മുൻപാണ് സോഷ്യല്‍ മീഡിയയിലൂടെ പുറത്തു വന്നുകൊണ്ടിരിക്കുന്നത് . ഇന്ത്യയിലെ ആദ്യത്തെ ട്രാന്‍സ് പാരന്റ്‌സ് ആയി കേരളത്തിലെ സിയ സഹദ് മാറിയിരിയ്ക്കുന്നു എന്ന വാര്‍ത്തയാണ് വൈറലായി മാറുന്നത്. കുഞ്ഞ് ജനിച്ചു, അച്ഛനും കുഞ്ഞും സുഖമായി ഇരിക്കുന്നു എന്ന ക്യാപ്ഷൻ നൽകിയാണ് സന്തോഷ വാർത്ത പുറത്തു വിട്ടിരിക്കുന്നത്. സിയ സഹദിന്റെ മെറ്റേണിറ്റി ഫോട്ടോഷൂട്ട് ചിത്രങ്ങൾ നൽകിയാണ് ദിയ സന പോസ്റ്റ് പങ്കുവെച്ചത്. ഹോസ്പിറ്റലിൽ അഡ്മിറ്റ് ചെയ്തു എന്ന വിവരം നേരത്തെ സിയ പറഞ്ഞിരുന്നു.
‘നല്ല സുഖമായി ആരോഗ്യത്തോടെ പ്രസവിച്ചു വാ മോനെ’ എന്നായിരുന്നു സിയയുടെ ആദ്യത്തെ പോസ്റ്റിലൂടെ പറഞ്ഞത്. കുഞ്ഞ് ജനിച്ചതിന് ശേഷം മറ്റൊരു ചിത്രം കൂടെ സിയ പങ്കുവച്ചു. ‘സിയ ഹസദിന് കുഞ്ഞ് ജനിച്ചു. അച്ഛന്‍ സഹദ് സുഖമായിരിയ്ക്കുന്നു’ എന്നാണ് സന്തോഷ വാര്‍ത്ത പങ്കുവച്ചുകൊണ്ട് പോസ്റ്റിലൂടെ അറിയിച്ചത്. ഏതാനും മിനിട്ടുകള്‍ക്ക് ശീതള്‍ ശ്യാമാണ് ആ വാർത്ത ആദ്യമായി പങ്കുവെച്ചത്. ഇന്ത്യ കാത്തിരുന്ന ആ കുഞ്ഞ് പിറന്നിരിക്കുന്നു. അവർ സുഖമായിരിക്കുന്നു എന്നാണ് ശീതള്‍ ശ്യാം ഇന്‍സ്റ്റഗ്രാമിലൂടെ കുറിച്ചത്. ഇതിന് താഴെ നിരവധി പേരാണ് സ്നേഹവും സന്തോഷവും അറിയിച്ചു കൊണ്ട് എത്തിയിട്ടുള്ളത്.
സന്തോഷ വാര്‍ത്ത പങ്കുവച്ചുകൊണ്ട് സിയയ്ക്കും സഹദിനും വേണ്ടി പ്രാര്‍ത്ഥിച്ചവര്‍ക്ക് നന്ദി അറിയിച്ചു കൊണ്ട് ദീപ്തി കല്യാണിയും ഇന്‍സ്റ്റഗ്രാമില്‍ എത്തി. ‘സിയ സഹദിന്റെ കുഞ്ഞിന്റെ കരച്ചില്‍ കേട്ടു, ദൈവാനുഗ്രഹത്താല്‍ അച്ഛനും കുഞ്ഞു ആരോഗ്യത്തോടെ ഇരിക്കുന്നു. പ്രാര്‍ത്ഥിച്ചവർക്കും കൂടെ നിന്നവർക്കും എല്ലാവര്‍ക്കും ഒരുപാട് നന്ദി അറിയിക്കുന്നു’ എന്നായിരുന്നു കുറിപ്പ്. ഈ ലോകത്തിലേക്ക് ഞങ്ങൾ ആ കുഞ്ഞിനെ സ്വീകരിക്കും എന്ന് പറഞ്ഞുകൊണ്ടാണ് വൈഗ സുബ്രഹ്‌മണ്യം സോഷ്യല്‍ മീഡിയ പോസ്റ്റ് ചെയ്തത്.
‘ക്വീര്‍ മനുഷ്യര്‍ക്കിടയില്‍ ആ കുഞ്ഞിന്റെ ജനനത്തോടെ പുതുയുഗം പിറവി എടുത്തിരിക്കുകയാണ്. ചില മനുഷ്യരുടെ പല ചോദ്യങ്ങള്‍ക്കും സംശയങ്ങള്‍ക്കും ഉള്ള മറുപടികൂടിയാണ് ഇനി വരുന്ന കാലം. കുഞ്ഞേ നീ വളര്‍ന്ന് ലോകത്തിന് കാഴ്ചയേകൂ’ എന്നാണ് വൈഗ എഴുതിയത്. എന്നാല്‍ സോഷ്യല്‍ മീഡിയയില്‍ പോസ്റ്റുകളിൽ ഒന്നും തന്നെ ആരും ഇവരുടെ കുഞ്ഞിന്റെ ജെന്റര്‍ വെളിപ്പെടുത്തിയിട്ടില്ല. എല്ലാ പോസ്റ്റിനും താഴെ കുഞ്ഞ് ആണാണോ പെണ്ണാണോ എന്ന് ചോദിച്ചുകൊണ്ടുള്ള കമന്റുകള്‍ വരുന്നുണ്ട് എങ്കിലും എവിടെയും ജെന്റര്‍ ഏതാണെന്ന് ആരും പുറത്തു വിട്ടിട്ടില്ല എന്നതും ശ്രദ്ധേയമാണ്.
