“വരുന്ന ഗസ്റ്റിനെ കരയിപ്പിക്കണം, കൂടാതെ നിങ്ങളും കരയണം, ആ പറഞ്ഞതിനോട് യോജിക്കാന്‍ കഴിഞ്ഞില്ല”; ചാനൽ ഷോയിൽ നിന്നും പിന്മാറിയതിനെ കുറിച്ച് മാല പാര്‍വ്വതി, ചാനലുകൾ കണ്ണീർ വിറ്റ് പൈസ ഉണ്ടാക്കുന്നു എന്ന് പ്രേക്ഷകരും
നീലത്താമര, ടൈം തുടങ്ങിയ സിനിമകളിലൂടെ മാല പാര്‍വ്വതി എന്ന നടി പ്രേക്ഷകര്‍ക്ക് സുപരിചിതയാകുന്നത്. ശേഷം മലയാള സിനിമയിലെ മുന്‍നിര അമ്മ വേഷങ്ങൾ താരത്തെ തേടി വന്നു. ടെലിവിഷനിൽ നിന്നായിരുന്നു മാല പാർവതിയുടെ തുടക്കം. ഇപ്പോഴിതാ റെഡ് കാര്‍പെറ്റ് എന്ന ഷോയില്‍ അതിഥിയായി എത്തിയപ്പോൾ പങ്കുവെച്ച വിശേഷങ്ങളാണ് ശ്രദ്ധ നേടുന്നത്. ചാനലുകളില്‍ മോണിങ് ഷോ ചെയ്തിരുന്ന കാലത്തെ ഓര്‍മകളാണ് താരം പങ്കുവെച്ചത്. രണ്ട് രണ്ടര വര്‍ഷത്തോളം അന്ന് താൻ മോണിങ് ഷോ പരിപാടികൾ അവതരിപ്പിച്ചിട്ടുണ്ട്.
ഇന്റര്‍വ്യു ചെയ്യുന്നതാണ് താൻ ഏറ്റവും അധികം ആസ്വദിച്ചിരുന്നത്. പല മേഖലകളില്‍ നിന്നുള്ളവരും എത്തിയിരുന്നു. രാഷ്ട്രീയം,സ്‌പോട്‌സ്, വ്യവസായം, സിനിമ തുടങ്ങി എല്ലാ മേഖലയിൽ നിന്നും ഉള്ള ആളുകളും അഭിമുഖത്തിന് എത്തും. വരാന്‍ പോകുന്ന ആളെ കുറിച്ച് മുന്‍കൂട്ടി വിവരം ഒന്നും നനമുക്ക് കിട്ടില്ല. ഏത് മേഖലയില്‍ നിന്ന് വരുന്നവരെയും അഭിമുഖം ചെയ്യണം. അത് കൊണ്ട് എല്ലാ വിഷയങ്ങളെ കുറിച്ചും പഠിക്കണമായിരുന്നു. ആ കാലം വളരെ രസകരമായിരുന്നു.
പക്ഷെ ഇന്ന് അങ്ങനെയല്ല. ആരാണ് അഭിമുഖത്തിന് വരുന്നത് എന്നൊക്കെ മുന്‍കൂട്ടി അറിയാനായി കഴിയും. ഇയര്‍ ഫോണിലൂടെ എന്തൊക്കെയാണ് എന്നത് നിര്‍ദ്ദേശങ്ങളും തരും. എന്നാൽ തനിക്ക് അതിനോട് താത്പര്യമില്ല. താൻ ആ പണി ഉപേക്ഷിക്കും വരെ അന്ന് മോണിങ് ഷോ വളരെ ഭംഗിയായി അവതരിപ്പിച്ചിട്ടുണ്ട്. കുറച്ചു കാലം മുൻപ് ഒരു ചാനലില്‍ നിന്നും തന്നെ വിളിച്ചിരുന്നു എന്നും അവർ പറഞ്ഞത് തനിക്ക് ഉൾക്കൊള്ളാൻ കഴിഞ്ഞില്ലെന്നും തരം പറയുന്നു. ഗസ്റ്റിനെ അഭിമുഖം ചെയ്താല്‍ മാത്രം പോരെന്നും അവരെ കരയിപ്പിക്കണം എന്നും പറഞ്ഞു.കൂടാതെ ഞാനും കരയണം എന്നാണ് അവർ പറഞ്ഞത്. അത് എനിക്ക് ഒട്ടും യോജിക്കാന്‍ പറ്റുന്ന കാര്യമല്ലായിരുന്നു.
ഒരാളെ ഇന്റർവ്യൂ ചെയ്യുമ്പോള്‍ അയാളുടെ കഥകളിലൂടെ, ജീവിതത്തിലൂടെ നമ്മളും സ്വാഭാവികമായി യാത്ര ചെയ്യും. കേള്‍ക്കുന്നവരെ തൃപ്തിപെടുത്താൻ വേണ്ടി ആയിരിക്കില്ല നമ്മള്‍ അഭിമുഖം ചെയ്യുന്നത്. ഓരോ ചോദ്യങ്ങളും അവരോടു ചോദിക്കുമ്പോൾ അവരെ കുറിച്ച് അറിയാനുള്ള ആകാംക്ഷയുണ്ടാവും. അതിൽ ചിലത് കരയിപ്പിക്കുന്ന അനുഭവമാവും. അത് കേൾക്കുമ്പോൾ നമ്മളും സ്വാഭാവികമായി കരഞ്ഞ് പോകും. അല്ലാതെ ക്യാമറയ്ക്ക് വേണ്ടി കരഞ്ഞ് അഭിമുഖം ചെയ്യാനൊന്നും തനിക്ക് കഴിയില്ല എന്ന് പറഞ്ഞു കൊണ്ട് ആ ഷോയിൽ നിന്നും താൻ ഒഴിവായി എന്നും മാല പാര്‍വ്വതി പറഞ്ഞു.